Vil du bli Språkrådets nye jurist?

Språkrådet har ledig ei fast stilling som jurist. Vi ser etter deg som har kunnskap om forvaltninga og forvaltningsjussen, oversikt over regelverket på språkfeltet og interesse for språklege rettar.

Arbeidsoppgåver

Som tilsett i denne stillinga får du hovudansvaret for å greie ut om rettar og plikter etter språklova. Du skal dessutan drive med sakshandsaming og gje råd om språklege rettar etter regelverket som er nemnt nedanfor, og svare på spørsmål både frå det offentlege og frå privatpersonar om språklege rettar. Hovudoppgåvene i stillinga vil vere arbeid med

• saker etter lov om språk (språklova)
• saker etter lov om stadnamn (stadnamnlova)
• saker etter lover på opplæringsfeltet, som opplæringslova, friskolelova, barnehagelova og universitets- og høgskolelova

Anna relevant regelverk er

• lover og konvensjonar som regulerer bruk av norsk teiknspråk
• lover og avtaler som vernar og tryggjar rettane til brukarar av kvensk, romani og romanes

Den som blir tilsett, skal også kunne gje interne råd om offentleglova og forvaltningslova. Det kan bli aktuelt å delta i forskriftsarbeid som Språkrådet blir involvert i.

Kvalifikasjonar

Du må ha

• master i rettsvitskap eller tilsvarande
• god kjennskap til regelverk som gjeld språk og opplæring
• solid kompetanse i både bokmål og nynorsk

Det er ein fordel om du har

• erfaring med tolkingsfråsegner
• erfaring med område innanfor jussen som ikkje blir prøvde for domstolane
• erfaring frå forvaltninga, særleg med utgreiingsarbeid, offentleg sakshandsaming og bruk av juridisk metode
• god forståing for Språkrådets samfunnsoppdrag og norsk språkpolitikk

Personlege eigenskapar

Du må vere initiativrik, sjølvgåande, effektiv og nøyaktig og kunne ta ansvar for framdrift i eigne tiltak og prosjekt. Du må òg ha gode samarbeidsevner.

Vi tilbyr

Hos oss får du

• interessante faglege utfordringar i ein organisasjon med eit viktig samfunnsoppdrag
• eit hyggjeleg og sterkt fagmiljø med kunnskapsrike og engasjerte kollegaer
• fagleg utvikling
• moderne og trivelege kontorlokale sentralt i Oslo med innandørs sykkelparkering og kort veg til kollektivnettet
• subsidiert kantine
• fleksibel arbeidstid
• høve til å arbeide på heimekontor (etter nærmare avtale)
• høve til å trene i arbeidstida
• medlemskap i Statens pensjonskasse

Stillinga blir plassert som rådgjevar (stillingskode 1434) eller seniorrådgjevar (stillingskode 1364) med årsløn frå 600 000 til 800 000 kroner i året, avhengig av kvalifikasjonar og erfaring. For særleg kvalifiserte søkjarar kan vi vurdere høgare løn. Ein søkjar må normalt ha minst fem års relevant erfaring for å bli vurdert som seniorrådgjevar.

Språkrådet meiner at inkludering og mangfald i arbeidslivet gjer at vi kan utføre samfunnsoppdraget vårt på ein god måte. Derfor ønskjer vi medarbeidarar med variert kompetanse og livserfaring og ulike fagkombinasjonar og perspektiv. Dersom det er kvalifiserte søkjarar med funksjonsnedsetjing, hol i CV-en eller innvandrarbakgrunn, kallar vi inn minst éin søkjar frå kvar av desse gruppene til intervju. For å bli vurdert som søkjar i desse gruppene, det vil seie å bli positivt særbehandla på denne måten, må søkjarane oppfylle visse krav. Les meir om krava på Arbeidsgivarportalen (https://arbeidsgiver.difi.no/positivsaerbehandling). Vi vil leggje til rette for medarbeidarar som treng det. Aktuell tilrettelegging kan til dømes vere tekniske hjelpemiddel, tilpassing av møbel eller endring av rutinar og arbeidstid. Vi oppmodar søkjarar om å krysse av i jobbsøkjarportalen dersom dei har funksjonsnedsetjing, hol i CV-en eller innvandrarbakgrunn. Avkryssingane i jobbsøkjarportalen blir anonymisert statistikk som alle statlege verksemder rapporterer om i årsrapportane sine. Fyll ut CV-felta i portalen (sjølv om du legg ved ein ferdig utfylt CV), og legg ved relevante vitnemål (frå Vitnemålsportalen). Dersom du har teke utdanning i utlandet, må du leggje fram dokumentasjon frå NOKUT eller Direktoratet for høgare utdanning og kompetanse. Vi gjer merksam på at opplysningar om søkjarane kan bli offentlege sjølv om søkjarane har bede om å ikkje bli førte opp på søkjarlista, jf. offentleglova § 25. For å sikre ei grundig og rettferdig vurdering av kandidatane brukar vi den arbeidspsykologiske testen People Test Person (PTP) i rekrutteringsprosessen. Testen vil bli gjennomført av ein ekstern samarbeidspartnar og vil berre bli brukt på kandidatar som går vidare i prosessen. Nærmare opplysningar om stillinga får du av avdelingsdirektør Marianne Aasgaard, tlf. 92 42 80 97.

Kontaktinformasjon

Marianne Aasgaard, Avdelingsdirektør, 92428097, marianne.aasgaard@sprakradet.no

Nøkkelinformasjon:

Arbeidsgiver: Språkrådet Referansenr.: 5153966173 Stillingsprosent: 100% Fast Søknadsfrist: 06.09.2026