Kommunikasjonsrådgivar

Om kommunikasjonsseksjonen

Som medarbeidar i kommunikasjonsseksjonen ved Statsministerens kontor blir du del av eit lag med ni erfarne kollegaer som blir leia av kommunikasjonssjefen.

Arbeidsoppgåvene i seksjonen er mellom anna å gje råd og leggje til rette for statsministerens og kontorets mediekontakt, skrive talar og planleggje reiser og ulike aktivitetar. Seksjonen støttar politisk leiing med å koordinere og planlegge kommunikasjonsarbeidet i regjeringa. Krisekommunikasjon er ei anna viktig oppgåve.

Me arbeider for å nå ut til publikum med relevant og viktig informasjon via regjeringa.no og sosiale medium. Kommunikasjonsseksjonen samarbeider tett med politikarane, departementa og andre aktørar i dette arbeidet.

Om stillinga

I kommunikasjonsseksjonen er det ledig ei fast stilling som kommunikasjonsrådgivar. Me søkjer deg som er samfunnsinteressert, som kan gje solid kommunikasjonsfagleg støtte, og som trivst på reisefot og med høgt tempo.

Den internasjonale tryggingssituasjonen gjer at det er mykje arbeid knytt til utanriks- og sikkerheitspolitikk, og planlegging av internasjonale reiser og besøk. Stillinga skal auke seksjonens samla kapasitet til å arbeide med desse områda, men den som blir tilsett skal også gje kommunikasjonsfagleg støtte på fleire saksområde.

Kvalifikasjonar

Du må:

• ha relevant høgare utdanning, med fullført grad på minimum bachelorgradnivå. Lang og relevant erfaring kan i særlege høve kompensere for kravet til utdanning.
• kunne formulere deg godt, både munnleg og skriftleg, på bokmål og nynorsk.
• kunne bruke engelsk som arbeidsspråk, både munnleg og skriftleg.
• ha ein god penn, og kunne skrive både talar, kronikkar og andre tekster.
• ha interesse og god forståing for politikk og samfunnsliv.
• ha erfaring frå relevant kommunikasjonsarbeid eller journalistisk arbeid. Internasjonal erfaring vil bli vektlagd.
• kunne formidle ein bodskap på ulike kommunikasjonsplattformer.
• ha erfaring med foto, film og arbeid i digitale kanalar.
• ha god kunnskap om offentleg sektor.
• ha evne til raskt å sette deg inn i nye problemstillingar.

Personlege eigenskapar:

Me søkjer ein person som er imøtekomande, løysingsorientert og som samarbeider godt. Du er pedagogisk, lærevillig og god til å tilpasse deg. Stillinga krev at du har god rolleforståing, analytiske evner, god vurderingsevne og forstår politiske prosessar. Du tar initiativ, jobbar sjølvstendig og er strukturert. Du har stor arbeidskapasitet, set deg raskt inn i ulike saker og trivst med eit høgt arbeidstempo. Du er fleksibel, og ikkje redd for å ta på deg nye oppgåver. Du har digital forståing, og ønskjer å bruke nye verktøy for å effektivisere arbeidsprosessane og betre leveransane.

Informasjon

Stillinga har stillingskode 1364 seniorrådgivar eller 1220 spesialrådgivar avhengig av utdanning og erfaring. For stilling som spesialrådgivar krevst høgare utdanning, med fullført grad på mastergradsnivå.

Lønn blir fastsett individuelt og vil liggje i spennet frå 750 000 til 1 100 000 kroner. For spesielt kvalifiserte kandidatar kan høgare lønn vere aktuelt. Stillinga er del av ei vaktordning med eit vakttillegg. Du må rekne med reiseverksemd, og morgon-, kvelds- og helgearbeid.

Den som blir tilsett må kunne sikkerheitsklarerast for STRENGT HEMMELEG.

Nærare opplysningar om stillinga kan du få ved å kontakte kommunikasjonssjef Anne Kristin Hjukse, tlf. 99 21 46 10, eller avdelingsdirektør Åsta Skre, tlf. 22 24 40 22.

Generell informasjon

Statlege arbeidsplassar skal spegle mangfaldet i samfunnet og gjere nytte av kompetansen til den enkelte. Me oppfordrar difor kvalifiserte kandidatar til å søkje, uavhengig av til dømes alder, kjønn, nasjonal eller etnisk bakgrunn. Me vil gjerne ha søknad frå deg som har stått utanfor arbeid eller utdanning i ein periode og som fyller kvalifikasjonskrava til stillinga.

Me oppfordrar alle som søkjer til å laste opp vitnemål frå Vitnemålsportalen og leggje ved søknaden, saman med kopi av relevante attestar.